Eet, slaap, sport!

Deur Sandy Prinsloo (Graad 6)

Laerskool Anton van Wouw blink al vir 96 jaar lank in Kultuur en Akademie uit, maar moenie vergeet van die sport wat ons ook al sedert 1925 beoefen nie!  Die woord “sport” het ons al dikwels gehoor.  Ons weet dit is ‘n manier om te ontspan en om jouself fiks te hou, maar vir sommige leerders is sport hul absolute passie!

Megan Nieman in Graad 6 geniet sport ontsettend baie en neem al vir nege jaar lank aan sport deel.  Sy pluk reeds die vrugte van haar harde werk!  In 2019 verteenwoordig sy Suid-Afrika by die Wêreldkampioenskappe in Florida, Amerika, deur deel te neem aan biathles .  Sy het ook aan die SANJ (South African National Juniors) deelgeneem.  Boonop het Megan die afgelope drie jaar Gauteng-Noord kleure in tweekamp, akrobaat, gimnastiek en atletiek behaal.  Haar  droom en doelwit is om eendag aan die Olimpiese Spele deel te neem!

Kobus du Plooy in Graad 2 beoefen rugby, swem… en sy heel gunsteling sport is gholf.  Hy neem aan sport deel sedert hy drie jaar oud is en oefen vyf dae ‘n week!  Hy het deelgeneem aan die US Kids Golf Tournament en het daar ‘n brons medalje verwerf.

Kobus vertel dat sy pa ook gholf speel en dat dit sy pa was wat hom aangemoedig het om te speel.  Dit is Kobus se droom om eendag ‘n groot gholftrofee in sy kamer te hê!

Ruan Nieman in Graad 5 beoefen golf, tennis, swem, atletiek en biathles, maar hy geniet krieket die heel meeste!  Hy neem reeds vir sewe jaar lank aan sport deel en vertel dat dit sy ma was wat hom aangemoedig het om aan sport deel te neem.  Ruan speel tans vir die Tshwane Titans PSI hokkie en het in 2019 aan die Suid-Afrikaanse Kampioenskappe in biathles deelgeneem.

Hierdie is slegs‘n handvol van Laerskool Anton van Wouw se sportsterre en daar is nog vele meer leerders vir wie sport hope pret, asook ‘n noodsaaklikheid is!

Die Wouwtjies geniet dit om die bal aan die rol te kry en hul passies ten volle uit te leef!

Wat is die punt van ‘n masker?

Deur Megan Naudé (Graad 7)

‘n Masker hou jou asem in      

voor jy nog met jou sin begin.             

Dit keer jou nie met speel en lag,    

maar beskerm jou met alle mag!

Jy moet dit heeldag dra,

al maak dit jou ‘n bron van kla.

Ons gaan dit glad nie baie mis,

solank ons net nie tyd verkwis!

Die jaar 2020 was ‘n wilde een, vol vreemde, onverwagse gebeurtenisse om elke hoek en draai!  Dit het egter nie die Wouwtjies ondergekry nie, omdat ons standvastige waardes het, hard werk en met ‘n gees wat skrik vir niks, elke dag ten volle aangepak het!  Na die uitstel van die terugkeer van leerders na die skool , het die deure uiteindelik op 15 Februarie 2021 weer wawyd oop gestaan om die onderwysers en leerders na die lang vakansie  terug te verwelkom! Van daardie dag is af is ons weer volstoom aan die werk, asook besig met sportoefeninge.  Natuurlik laat die gewilde Kaskardag almal se harte tiekie-draai van opgewondenheid!

Al moet ons nou maskers dra, het dit ons nie gekeer om steeds ons sosiale lewe hoog te ag nie! (Soms so ‘n bietjie hoër as die akademie, veral oor naweke.) Ons gesels vir ure met mekaar oor wie weet wat en hou selfs meer as die verlangde sosiale afstand!

Dit is meer as genoeg bewys dat ‘n masker dalk jou gesig mag wegsteek, maar definitief nie jou persoonlikheid nie!  Die Wouwtjie-gemeenskap staan hand aan hand (1,5 meter uitmekaar) en reg om die virus te beveg!

Laerskool Anton Van Wouw keer stadig, maar seker, terug na normaal

Deur Meaghan Lamprecht (Graad 6)

Op 23 Maart 2020, het President Cyril Ramaphosa ‘n grendeltydperk in Suid-Afrika ingestel.  Almal was vasgevang in hul huise en mag nêrens heen gegaan het nie, in ‘n poging om die verspreiding van die nuwe Covid-19 virus te bekamp.  Ons het behoorlik soos voëltjies in ‘n hok gevoel!  Ons kon nie ons families of vriende besoek het vir ‘n baie lang ruk nie en ons moes vir eers ons skoolwerk tersyde stel.  Die lang vakansie was aanvanklik lekker, maar later het dit nie meer so wonderlik gevoel nie.  Ek kon vir my vriendinne boodskappe stuur van my ma se selfoon af, maar dit is nie dieselfde  as om iemand in persoon te sien en mee te gesels nie.

Die jaar 2020 het so voortgegaan, totdat ons weer later ons skoolwerk kon begin doen vanuit ons huise.  Wat ‘n uitdaging vir die onderwysers, leerlinge, sowel as die ouers!  Die personeel by Laerskool Anton van Wouw het hul bes probeer om vir ons as leerlinge die leerproses te vergemaklik en het onder andere lesse aangebied deur ‘n nuutgeskepte digitale platform.

Dit was wonderlik om weer later die jaar terug te kon keer skool toe!  Op een dag het die meisies skool bygewoon en die volgende dag was dit die seuns se beurt.  Leerlinge moes in graadverband op verskillende plekke op die skoolterrein sit tydens pouses, sowel as in klasverband.  So, as jou maatjie in ‘n ander klas was, kon jul mekaar nie sien nie!

Op 15 Februarie 2021 het die skool weer amptelik geopen vir die skooljaar van 2021!  Al die leerlinge kon toe terugkeer na die skool, maar mag nog steeds nie saam speel tydens pouses of sonder hul maskers loop nie.  Die kinders sit nog steeds geïsoleer in graadverband op verskillende plekke op die skoolterrein, ter wille van sosiale afstand en hul algemene veiligheid en gesondheid.

Ons het egter onlangs die beste nuus ontvang!  Van nou af mag die leerders in graadverband, voor die skooldag begin, asook tydens pouses op die verskillende speelterreine saam speel.  Natuurlik moet ons steeds ons maskers dra en sosiale afstand handhaaf, maar dit maak nie vir ons saak nie, want ons kan weer met mekaar gesels, grappies maak en lag!

‘n Hele jaar het al verloop sedert daardie ingehokte grendeltydperk.  Wie weet?  Dalk vra ons volgende jaar hierdie tyd vir mekaar, Corona-wie?  So asof hierdie wrede virus nooit bestaan het nie!  Hopelik het ons uit hierdie vreemde tyd in ons lewens geleer om waarlik die klein dingetjies in die lewe te waardeer!

Meneer Henning in die kollig!

Deur Chanté Stremmelaar (Graad 6)

Die Wouwtjies wonder seker soms wat Meneer Henning se gunsteling kleur of sy gunsteling fliek is.  Ek het ‘n bietjie ondersoek gaan instel en vir Meneer Henning ‘n paar persoonlike vrae gevra, sodat ons meer van hom te wete kan kom:

Hoe streng is Meneer teenoor die onderwysers op ‘n skaal van 1 -10?

Wat die standaard van ons skool betref, is ek ‘n 10 op daardie skaal!  Ek is streng met die onderwysers daaroor dat die korrekte standaard gehandhaaf moet word, maar in terme van hul menslikheidsfaktor, plaas ek myself by ‘n 5 op die skaal.  Dus is ek hard op standaarde, maar sag op mense.

Wie of wat het Meneer geïnspireer om ‘n skoolhoof te word?

Ek het op skool ‘n onderwyser gehad wat vir my Geskiedenis gegee het.  Hy het die lesse so passievol aangebied, dat hy vir my ‘n inspirasie was!  Boonop wou ek nog altyd met kinders werk.

Het Meneer enige troeteldiere?

My hond is ‘n groot Bullmastiff wat omtrent 60kg weeg!

In watter Laerskool was Meneer?

Ek was in Laerskool Jozua Naudé in Roodepoort.

Wie is Meneer se gunsteling Wouwtjie- onderwyser?

Ek het soveel respek vir die onderwysers, want hulle almal werk ongelooflik hard!  Ons Wouwtjie-personeel verrig sowaar hul werk met passie!  Daar is dus nie net een onderwyser wat ek wil of kan uitsonder nie.

Watter beroep wou Meneer beoefen het toe u nog op skool was?

Ek het daaraan gedink om onderwys te studeer, maar het ook belang stel in die regte.  Ek wou ‘n prokureur geword het.

Het Meneer enige stokperdjies?

Ek geniet fotografie en om tyd saam met my familie deur te bring.

Na watter tipe flieks kyk Meneer graag?

Ek hou van flieks vol aksie en ook van dié gebaseer op ware verhale.

Wat was Meneer se gunsteling vak op skool?

Ek het Geskiedenis die meeste geniet!

Deel met ons Meneer se grootste prestasie wat u al ooit bereik het.

Dit is toe ek aangewys is as ‘n skoolhoof.

Wat is Meneer se gunsteling kleur?

Ek is besonder lief vir blou.

Watter stukkie wysheid sal Meneer graag met al die Wouwtjies wil deel?

Jy moet nooit bang wees om te leer uit jou foute uit nie, solank jy net leer daaruit!  Wees altyd bereid om dit te erken as jy ‘n fout gemaak het en probeer volgende keer nóg harder.  Gee altyd net jou heel beste.

DIE AMFITEATER TREK ‘N NUWE BAADJIE AAN

Deur Kiki Butler (Graad 6)

Na ’n lange gewag, staan daar die Dinsdagoggend van 23 Maart 2021, ‘n splinternuwe staalstruktuur in die amfiteater van Laerskool Anton van Wouw!

Die proses wat aanleiding gegee het tot die bou van die nuwe amfiteater, het eintlik al gedurende die grendeltydperk begin.  Die bestaande skadunette in die amfiteater is verwyder en reuse gate is gegrawe om die nuwe staalstruktuur te ondersteun.

Maar wag eers, kom ons begin van die heel begin af!

Waarom is daar besluit op die nuwe staaldak in die amfiteater?

Die doel van die amfiteater se nuwe dak is deeglik ondersoek.  Die huidige skoolsaal is te klein om al ons Wouwtjies en hul ouers te akkommodeer.  Dít is natuurlik te wyte aan die groeiende getalle van ons skool.  Tans kan daar slegs 320 stoele in die saal inpas tydens funksies.  Die vergroting van die skoolsaal is ook ondersoek.  Dit was ‘n moontlikheid om die bestaande skoolsaal langer en hoër te maak, maar as gevolg van die kostes en ander praktiese redes, moes ‘n ander alternatief gevind word.

Die skadunette van die amfiteater het die einde van hul leeftyd bereik en kon nie meer genoeg beskerming teen die sonlig bied nie.  Aangesien daar meer spasie was in die amfiteater en die skadunette verwyder móés word, het dit net sin gemaak om hierdie groter spasie as die “Nuwe Wouwtjie Skoolsaal” te benut.  Die skool se beheerliggaam is geraadpleeg en na deeglike oorweging, is daar besluit om ‘n nuwe dak oor die amfiteater te bou!

Die droom is in werklikheid ‘n toegeboude amfiteater, maar daar is besluit om vir nou slegs die eerste fase van die bouproses te laat plaasvind.  Die tweede fase van die projek is eintlik ‘n groot verrassing!  ‘n Amfiteater met mure, om weersomstandighede soos reën, wind en die koue uit te hou.  Ook vorm ‘n splinternuwe verhoog en ‘n goeie klankstelsel deel van die beplanning.

Hierdie droom kan egter slegs ‘n realiteit word as daar hard gewerk word aan die skool se verskeie jaarlikse fondsinsamelingsprojekte.

Die Wouwtjies sien so uit na ons eerste funksie en samekoms in Laerskool Anton van Wouw se splinternuwe amfiteater!

Naelbyt-oomblikke vir Enviro-leiers

Deur Zoe Louw (Graad 7)

Die Gryswater Uitdaging het op 22 Maart 2021 afgeskop by Laerskool Anton van Wouw.

Gabby Dorner en Shay Nel is as die organiseerders van die Gryswater-uitdaging aangestel.  Hulle het ‘n prys belowe vir die klas wat die meeste gryswater kon insamel.

Die kompetisie het egter aanvanklik traag gevorder, weens ‘n gebrek aan entoesiasme.  Gabby en Shay het gou besef dat hulle sal moet ingryp!  Hulle besluit toe om die prys vir die Gryswater Uitdaging se wenner bekend te maak.  Die eerste prys was pizza’s vir die hele klas en die tweede en derde plekke het suigstokkies ontvang.  Na dié aankondiging, het die gryswater letterlik begin instroom!

Op die laaste dag van die Gryswater-uitdaging was daar egter konsternasie!  Die ongeduld het hoog geloop by al die deelnemers.  Hulle het daarop aangedring dat die wenners so gou as moontlik bekend gemaak moet word.  Die organiseerders van die Gryswater-uitdaging moes toe haastig honderde liters water meet en kon kort daarna aankondig dat Graad 4Z die wenners van die Gryswater-uitdaging was.

Alhoewel daar vir Gabby Dorner en Shay Nel ‘n paar naelbyt-oomblikke was, is hulle verlig dat hulle ‘n bydrae kon lewer tot die omgewing.  Hulle kon selfs ‘n stukkie pizza by die wenners gaps!

Die Pawson-Pakket

Deur Nina Nel en Mia van Rooyen (Graad 7)

Ons het ‘n heerlike gesprek gehad met die gewilde Pawson-broers, wat toevallig saam by ons skool werk.  Ons het hulle vrae gevra oor hul grootwordjare, skooldae en hul drome vir die toekoms.  Kom leer saam met ons meer van Laerskool Anton van Wouw se Pawson-Pakket!

Waar het Meneer-hulle grootgeword?

Ons het in Randfontein grootgeword.  Ons het daar gewoon totdat ons universiteit toe gegaan het.

Noem ‘n insident uit Meneer-hulle se kinderjare waar julle baie stout was.

Ons was redelik soet as kinders, maar ons het tog soms “Tok-Tokkie” gespeel en eiers op mense se karre en voordeure gegooi!

Wie van julle twee is meer verantwoordelik?

Mnr. Marinus: Ek is meer verantwoordelik as dit by die skool kom, maar Heinrich is meer verantwoordelik wat sy huis en familie betref.

Mnr. Heinrich: Ek stem saam met daardie stelling!

Moes julle klere deel toe julle klein was?

Mnr. Marinus: Ja, ek moes Heinrich se klere dra as dit hom nie meer gepas het nie.  Nou is dit anders om!

Vir die mense wat nie geweet het dat julle ‘n sussie het nie, kan julle ons ‘n bietjie meer vertel van haar?

Sy is jonger as ons, 25 jaar oud en ‘n onderwyseres by dieselfde skool as ons ma.  Sy is ook ‘n 400m SA hekkies-kampioen!

Het julle enige gewoontes wat die ander een irriteer?

Mnr. Marinus: Ja, Heinrich wil dinge altyd op sy manier hê!

Mnr. Heinrich: Nee wat, nie regtig nie.

Hou Meneer-hulle van dieselfde kos en klere?

Mnr. Heinrich: Meestal, ja!

Mnr. Marinus: Heinrich het meer styl as ek!

Hoe was julle op hoërskool?  Bleeksiele, sportief, musikaal, sosiaal of gewild?

Mnr. Heinrich: Ons het altwee BAIE van sport gehou!

Mnr. Marinus: Ek het graag aan kultuur deelgeneem en het in die koor gesing.  Ek was akademies sterk en was mal oor hokkie.

Mnr. Heinrich: Ek het ook van kultuur gehou en in die koor gesing.  Ek het krieket en rugby gespeel en ons was altwee in die eerste tennisspan!  Marinus het meer onderskeidings behaal as wat ek het in matriek.

Wie is die slim een en wie die aantreklike een tussen julle twee?

Mnr. Marinus: Ek is die slim een en Heinrich die aantreklike een!

Mnr. Heinrich: Ja, alhoewel ek ook dink ek is slim!

Na watter tipe musiek luister Meneer-hulle graag?

Mnr. Marinus: Ek hou van enige musiek, afhangende van my bui.

Mnr. Heinrich: Ek hou meer van lekker Afrikaanse sokkie musiek!

Baklei julle soms nog?

Nee. Ons is baie rustig teenoor mekaar.

Het julle ooit gedink dat julle by dieselde skool sal werk? Geniet julle dit om saam te werk?

Nee,glad nie!  Dit is baie lekker, maar ons sien mekaar nie so baie nie.

Waarom het julle albei onderwysers geword en hoekom het julle Laerskool Anton van Wouw gekies om by skool te hou?

Mnr. Marinus: Ek is as ‘n onderwyser gebore!  Dit is die enigste skool waar ek nog ooit aansoek gedoen het en ek het die pos gekry!

Mnr. Heinrich: Ek wou ‘n beroep kies waar ek met mense kon werk en ek hou baie van sport.  Pretoria het heelwat goeie skole, maar ek het sulke goeie dinge gehoor van die Wouwtjies, dat ek dit graag wou kom ervaar!

Daar het julle dit! Ons ken die broers nou heelwat beter en is baie in ons skik  daarmee dat die Pawson-Pakket deel is van die Wouwtjie-familie!

Waar Is Willem Wouw?

Deur Skye Smit en Kay-Lee McDonald (Graad 7)

Willem Wouw!  Willem Wouw!  Waar is Willem Wouw?

Willem Wouw is weg!  Ons het hom amper twee jaar gelede laas gesien!

Ons almal onthou nog sy vriendelike glimlag, groot passievolle oë, modderbruin vere en goudgeel snawel.  Hy is ‘n geelbekwou valk (ja, ek het ook gedink hy is ‘n uil) wat baie hou van mense en mal is oor sy pitkos!

Willem Wouw was altyd daar om die Graad 1’s te verwelkom en die sportspanne aan te moedig as hulle oefen.  Hy het ál die Wouwtjies laat glimlag en altyd saam met ons gespeel, maar waar is hy nou?

Ons het van ons Wouwtjie-vriende gevra waar hulle dink Willem Wouw is.

Hier volg ‘n paar leidrade:

• Ruben en Johan (Gr. 1V) sê dat hulle dink Willem Wouw is dalk in ‘n boom, ‘n bos, of in ‘n woud.  Robynne (Gr. 1X) en Divan (Gr. 1W) stem saam met hulle.
• Madeley (Gr. 1V) dink hy’s in die skool se uilboks.  Eleanor (Gr. 1V) en Micke (Gr. 1Y) dink Willem Wouw kruip weg in die houthuisie.
• Lisa (Gr. 7V) dink hy’s onder die verhoog in die saal, terwyl Michael (Gr. 7Z) dink dat hy weggevlieg het!
• Die res van die Gr. 7’s vermoed iets eienaardigs het met Willem Wouw gebeur!
• Ons het vir Mnr Jaco gevra en hy sê die laaste keer toe hy vir Willem Wouw gesien het, het hy vir sy vriend Eagi by die Noord-Wes Universiteit gaan kuier. Meneer Jaco dink egter dat Willem Wouw gaan studeer het om ‘n onderwyser te word.
• My pa dink Willem Wouw is op vakansie in die Bahamas en lê met lang, yskoue sambreel-koeldranke op die strand terwyl hy wag vir die Covid-19 virus om te verdwyn.

Selfs met al hierdie leidrade, kon ons nog steeds nie vir Willem Wouw vind nie!  Dit is waarom ons die Wouwtjies se hulp nodig het!  Volgende kwartaal gaan Willem Wouw tien spesiale, genommerde voël-verwante artikels wegsteek.  Wanneer die Wouwtjies al tien hierdie dinge gevind het, sal Willem Wouw weer sy verskyning maak!

Julle moet heeltyd op die uitkyk wees vir Willem Wouw en sy weggesteekte artikels!

Sterkte met die soektog!

Ons nuwe Graad 1’s se eerste treetjies

 Deur Sandy Prinsloo en Gisele Geldenhuys (Graad 6)

Onthou jy nog jou heel eerste skooldag?  Jy het opgewonde vir Willem Wouw by die hoofhek gegroet met jou splinternuwe skoolskoene aan, haartjies netjies gekam en jou ouers wat honderde foto’s van jou neem!  Dit is presies wat die nuwe Graad 1’s van 2021 beleef het.

Die Graad 1’s van Laerskool Anton van Wouw se eerste skooldag het op 12 Februarie plaasgevind.  Hulle het die skool op daardie dag tot 11:45 besoek. Volgens Mia Jansen, Leon Greef en Thomas du Plessis, wat vanjaar in Graad 1 is, was hul eerste dag baie lekker!  Hier volg wat hulle nog vir ons vertel het:

Mia het met ons gedeel dat haar mamma haar op die eerste skooldag afgelaai het en saam met haar na haar nuwe klas toe kon stap.  Thomas vertel dat die Graad 1’s bederf is met lekkers by die hoofhek toe hulle by die skool ingestap het.  Leon se mamma het hope foto’s geneem en hy het sommer gou almal in sy klas leer ken.

Mia en Thomas stem saam dat hulle gunsteling deel van die skool, die snoepie is!  Leon reken alhoewel skool vir hom lekker is, dit glad nie pret is om elke middag te sit en huiswerk doen nie!  Al drie is egter gaande daaroor om te kan swem tydens Kinetika.  Thomas dink ook dit is glad nie snaaks om elke oggend só vroeg op te staan nie, maar hy hou baie van die juffrouens en natuurlik veral van die pouses!  Mia geniet elke oomblik daarvan om met haar maatjies te speel en voel die skool is baie groot.

Ons dink met nostalgie terug aan ons eie eerste skooldae wat min of meer net soos Mia Jansen, Leon Greef en Thomas du Plessis se eerste skooldag verloop het!  Die Wouwtjies glo dat ons nuwe Graad 1’s se pad by Laerskool Anton van Wouw net so vol pret sal wees soos hulle Graad 1 jaar tot dusver.